Ujenzi wa Uadiliswhaji wa Watoto katika Jamii: Mifano: Riwaya ya Mshale wa Matumaini na Cheupe na Cheusi

Ikisiri

Fasihi huchukua nafasi kubwa katika jamii kwani ni chombo muhimu sana cha kusawiri masuala nyeti yanayofungamana na jamii kwa jumla. Mojawapo ya masuala yanayofungamana na jamii ni lile la maadili. Utafiti huu ulishughulikia nafasi ya fasihi ya watoto katika kuadiliza watoto kama inavyodokezwa katika riwaya teule za Mshale wa Matumaini na Cheupe na Cheusi. Katika utafiti wetu tuliongozwa na nadharia ya maadili iliyoasisiwa na Plato kutoka Ugiriki mnamo mwaka wa 387 kabla ya Kristo na ambayo inalenga kutatua matatizo yanayokumba jamii kwa minajili ya kujenga jamii bora iliyo na maelewano. Lengo kuu la utafiti huu lilikuwa ni kuchunguza vipengele vya maadili katika wahusika watoto kwenye riwaya teule. Data hitajika ilipatikana kwa kusoma riwaya mbili zilizoteuliwa na mtafiti. Vile vile, data ilipatikana katika maktaba za Chuo Kikuu cha Mount Kenya pamoja na Chuo Kikuu cha Jaramogi Oginga Odinga pale ambapo mtafiti alisoma nakala za tasnifu zinazohusiana na mada ya uadilifu, vitabu, magazeti na majarida yaliyo na mada zilizo na uhusiano na mada tafitiwa. Pia, mtafiti alitalii mtandao kwa kusudi la kusaka habari zaidi zinazohusiana na mada za uadilifu katika jamii ya mwanadamu. Utafiti huu ulitumia usampulishaji wa kimaksudi ambapo sampuli lengwa ilikuwa makala zinazohusiana na uadilifu pamoja na riwaya mbili teule. Mbinu ya kimaelezo ilitumika katika kuwasilisha matokeo ya utafiti. Utafiti utafaidi jamii kwa kuiongezea maadili muhimu ya kuikuza. Pia, utakuwa marejeleo kwa taaluma ya fasihi kwa watafiti wa baadaye. Walimu wanaotangamana na wanafunzi watafaidika na upanuzi wa maudhui ya uadilifu na mengine yanayojengwa na vipengele vya maadili haswa wanapotangamana na watoto. Katika mchakato mzima wa utafiti, maadili yote hitajika yalizingatiwa ili kuhakikisha kuwa utafiti ni wazi na wa kuaminika na nyanja zote husika..